1-Dekabr Butunjahon OITS ga qarshi kurashish kuni

BUGUN — BUTUNJАHON OITSGА QАRShI KURАSh KUNI

 Jahon sogʼliqni saqlash tashkiloti hamda Birlashgan Millatlar Tashkiloti Bosh Аssambleyasining 1988 yildagi qaroriga asosan, 1 dekabr sanasi Butunjahon OITSga qarshi kurash kuni sifatida nishonlanadi. Maʼlumotlarga koʼra, hozir dunyoda OIV infektsiyasini yuqtirgan qariyb 40 million nafar bemor bor. Ular soni yiliga 1,5 million kishiga ortyapti. Eng yomoni, kasallik har yili 600 ming kishini hayotdan olib ketmoqda. 

➡️ Mutaxassislar bunday oʼsish dinamikasini xastalikka erta bosqichda tashxis qoʼyilmasligi bilan izohlaydi. Masalan, JSSTning Yevropa mintaqaviy byurosiga qarashli 53 mamlakatda (Markaziy Osiyo davlatlari ham shu roʼyxatda) OIVga chalingan bemorlarning toʼrtdan bir qismi oʼz xastaligidan bexabar boʼlsa, qariyb yarmi oʼz tashxisini juda kech bosqichda biladi. Mamlakatimiz OITSga qarshi kurash tizimi boʼyicha keyingi yillarda barcha yoʼnalishlarda qator yutuqlarga erishib kelmoqda.  Xalqaro ekspertlarning xulosa qilishicha, 2030 yilgacha OIVning aholi salomatligiga tahdid sifatidagi global xavfini kamaytirishga doir ustuvor maqsadlarga erishish mumkin. 

➡️Mamlakatimizda JSST tavsiyalariga muvofiq, OIV infektsiyasi onadan bolaga yuqishining oldini olish dasturi joriy etilgan. Unga koʼra, har yili oʼrtacha 600 ming homilador ayollar OIVga tekshiriladi. Infektsiyali ayollardan tugʼilgan chaqaloqlarga xastalik yuqishining oldini olish maqsadida retrovirusga qarshi dorilar oʼz vaqtida berib boriladi. Onasi chet davlatlarda boʼlib, faqat tugʼish vaqtida Oʼzbekistonga kelgan yoki shifokorlarning tavsiyasiga amal qilmagan hollarda chaqaloqlarning kasallikni yuqtirib olishini kuzatish mumkin. Infektsiya onadan bolaga oʼtishining oldini olish maqsadida retrovirusga qarshi joriy etilgan profilaktika samaradorligi 95 foizdan ziyod darajani koʼrsatmoqda.

➡️ OIV infektsiyasini respublikamizda tarqalishining oldini olish maqsadida YuNISEF, YuNFPА kabi halqaro tashkilotlar bilan bir qator loyihalar amalga oshirilmoqda. Ushbu Butunjahon OITSga qarshi kurash kunida biz kim boʼlishimizdan va qaerda yashashimizdan qatʼiy nazar, global tengsizlik barchamizga taʼsir qilishini eslatib oʼtishimiz kerak. Ushbu Butunjahon OITSga qarshi kurash kunida biz tengsizlikka barham berish va OITSga, shuningdek, tengsizlik tufayli tarqaladigan barcha boshqa pandemiyalarga barham berish uchun harakat qilishga chaqiramiz. OIV infektsiyasi yuqishining oldini olishda eng muhimi, sogʼlom turmush tarzi qoidalariga amal qilish, giyoxvandlikni va zararli odatlarni oldini olish, yoshlar oʼrtasida nikohdan oldingi tibbiy koʼrikning ahamiyati toʼgʼrisida hamkorlikda targʼibot tadbirlarini yanada kuchaytirish lozim.