Yangi 2025 yil muborak bulsin!

                                                   O‘zbekiston xalqiga Yangi yil tabrigi

                                                           Muhtaram vatandoshlar!

  Siz, azizlarni, koʼpmillatli Oʼzbekiston xalqini yangi – 2025 yil bilan chin qalbimdan muborakbod etaman.  Jahondagi murakkab vaziyatga qaramasdan, oʼtayotgan yil mamlakatimiz uchun qutli va barakali boʼldi. Buning uchun har qancha shukrona aytsak, arziydi. Mehnatkash xalqimizning fidokorona mehnati, siyosiy-ijtimoiy faolligi bilan Yangi Oʼzbekiston gʼoyasi real voqelikka aylanmoqda. Oliy Majlis va mahalliy kengashlarga boʼlib oʼtgan saylovlar demokratik islohotlarning yangi davriga qadam qoʼyganimizni yana bir marta tasdiqladi. Yurtimizda yuqori texnologiyali yangi sanoat majmualari, infratuzilma va logistika tarmoqlari, avtomobilь va temir yoʼllar barpo etildi. Biznes, IT va turizm sohalari izchil rivojlanmoqda. Аholi daromadlari va turmush sifati oshmoqda. Mirishkor dehqon va fermerlarimiz, klasterlarimiz ishchi-xizmatchilari mardona mehnat qilib, moʼl hosil yetishtirdilar.  Yangi uy-joylar, bogʼcha va maktablar, oliygohlar, madaniyat va sport maskanlari qad koʼtarmoqda. Yurtimiz tobora obod qiyofa kasb etmoqda. Minglab yurtdoshlarimiz Yangi yilni yangi uylarda kutib olmoqda. Bilimli va shijoatli, navqiron yoshlarimiz ulkan yutuqlarni qoʼlga kiritmoqda. Аyniqsa, Olimpiya va Paralimpiya oʼyinlarida erishilgan rekord natijalar milliy sportimiz tarixida yangi sahifa ochdi. Fuqarolik jamiyati institutlari, xususan, mahallaning roli va taʼsiri kuchaymoqda. Maʼnaviy yuksalish jarayonlari hayotimizda yangi kuch, yangi harakatga aylanmoqda. Global ahamiyatga ega tashabbuslarimiz jahon hamjamiyati tomonidan qoʼllab-quvvatlanmoqda. Xalqaro maydonda Oʼzbekistonning raqobatbardosh mamlakat, ishonchli hamkor sifatidagi obroʼ-eʼtibori yuksalib bormoqda. Hech shubhasiz, bularning barchasi diyorimizdagi barqarorlik, doʼstlik va hamjihatlik natijasidir. Bugungi shukuhli oqshomda siz, azizlarga, olijanob va bunyodkor xalqimizga halol mehnatingiz, ona yurtga sadoqatingiz uchun samimiy minnatdorchilik izhor etaman.

            Qadrli doʼstlar! Biz 2025 yilga mamlakatimizda Аtrof-muhitni asrash va “yashil iqtisodiyot” yili deb nom berdik. Аsosiy maqsadimiz – inson va tabiat muvozanatiga asoslangan tizim yaratishdir.

Yangi yilda biznes uchun yanada keng imkoniyatlar yaratiladi. Xususiy mulk daxlsizligini taʼminlash, xorijiy investitsiyalarni faol jalb etish ishlarini qatʼiy davom ettiramiz.  Ijtimoiy sohalar, ish haqi, pensiya va stipendiyalar, nafaqalar miqdorini oshirish eʼtiborimiz markazida boʼladi. Farzandlarimizning zamonaviy bilim va kasb-hunar egalari, barkamol boʼlib tarbiya topishlari uchun bor kuch va imkoniyatlarimizni safarbar etamiz.  Ilm-fan, taʼlim, sogʼliqni saqlash, madaniyat va sanʼat, sport sohalariga eʼtibor yanada kuchaytiriladi. Muhtaram faxriylarimiz, xotin-qizlar va yoshlarga gʼamxoʼrlik qilish, ijtimoiy himoya samarasini oshirish ustuvor vazifamiz boʼlib qoladi. Qurolli Kuchlarimiz salohiyatini mustahkamlash, harbiy xizmatchilar va ularning oila aʼzolarini qoʼllab-quvvatlash ishlarini yangi bosqichga koʼtaramiz. 

Muxtasar aytganda, “Inson qadri uchun, inson baxti uchun!” degan olijanob maqsadni barchamiz birgalikda amalga oshiramiz.  Аziz va muhtaram yurtdoshlar! Barchangizni, chet ellardagi vatandoshlarimiz, xorijiy hamkor va doʼstlarimizni bugungi qutlugʼ bayram bilan yana bir bor chin dildan tabriklayman. Yangi yil har bir inson, har bir oilaga, jonajon yurtimizga katta-katta yutuq va omadlar olib kelsin!

Hamma ezgu niyatlarimiz roʼyobga chiqsin! Yangi yil barchamizga muborak boʼlsin! 

Shavkat Mirziyoev,
Oʼzbekiston Respublikasi Prezidenti